تعبيرية
صراحة نيوز – نشر المواطن غالب المبيض على صفحة الفيسبوك خاصته رسالة معبرة عن ما آلت اليه احوال الاردنيين قال انها من والدته موجهة الى جلالة الملك عبد الله الثاني بن الحسين .
تاليا نص الرسالة
رسالة من امي للملك .الله يصبحك بالخير يا ميمتي يا عبدالله كيف حالك وكيف مرتك واولادك ان شاءالله انكم بخير وصحتكم بخير .والله يا ميمتي ما انا عارفة من وين ابلش حكي بس بقلك انا مرة عمري ٧٠ سنة ارملة وعندي ٤ اولاد وبنتين اكبر عيالي اسمه غالب يعني انا ام غالب عيالي كلهم متجوزين والحمدلله .بناتي الثنتين الكبيرة متجوزة ومستورين الحمدلله والثانية جوزها اخذها وطلع يدور رزقه بالسعودية طبعا لما اخذها وطلعوا اخذ روحي معها مهي اخر العنقود المدلله الصغيرة جوزها كان شغله مليح وعايشين مستورين زي هالناس بس من ٣ سنين بعد ما صارت البلد خليط بليط وصاروا جيرانا من هالدول الي حولينا يجوا علينا خرب شغل جوز بنتي وصار يقعد اكثر ما يشتغل وهاظ لان الغريب صار ينافسه بشغله وباسعار ما بتوفي مع ابن البلد عشان هيك ضاقت فيه الدنيا وكره حاله وكل اشي حوليه وهج من البلد زيه زي الالوف من عيالنا .اما ولادي يا ميمتي يا عبدالله فشعلهم صار على قدهم دوبهم قايمين ببيوتهم وعيالهم برغم والله ما هما مقصرين معي يعني بقيموا من ثمهم وبيعطوني ومش مخليني محتاج اشي بس انا والله صرت استحي منهم لان وضعهم ورزقتهم مش زي اول .يعني صاروا يحرموا حالهم حتى من اساسيات الحياة عشان ما يقصروا معي .الله يرضى عليهم والله احيانا انا بعرف ما بكون مع الواحد دينار بجيبته لان شغله زي العمة ومش طالع بأيده اشي .بقول لابني غالب الكبير ليش يما هيك صاير شغلكم بقلي يما البلد صارت مش النا الغريب بشتغل وبيوكل وبيشرب وبيدفع اجار البيت ووضعه احسن منا .غير انه الحرامية والفاسدين ما خلوا مصاري بالبلد الكل بنهب وبيعبي جيابه وبهرب برا البلد .معقول يا ميمتي يا عبدالله هالحكي صاير عنا ولا غالب بيضحك علي وبدور حجج لانه حاسس انه مقصر .انا بعرف هاظ غالب لسانه طويل والي براسه بحكيه لو على قطع راسه حتى انه بقلي .يما الملك زينا نفسه يشوف الاردن احلى بلد بالعالم والناس مرتاحين وشبعانين بس هالملك مسكين والله ماهو قادر لشلة الحرامية والسرسرية والفاسدين من كثرهم حتى انهم بوصلوا للملك انه الناس مبسوطين وشبعانين ومرتاحين وعايشين كانهم بسويسرا .هو يما يا عبدالله هي سويسرا هاي طبخة ولا شو .ما علينا الله يرضى عليك يا ميمتي انك تنزل للشارع تفقد هالناس ولا ترد عالشذابين الي ما بيحكولك الصحيح الناس والله جاعت والطفر لعن ابوهم بعزا امهم والحرامية واللصوص قاعدين ببيعوا البلد والعيال صاروا بدهم يهجوا ويتركوها للحرامية يشبعوا بيها .واخر اشي يا ميمتي يا عبدالله جهتك بالله اي يوم بتلاقي حالك فاضي تيجي علي اعملك طاسة مقلوبة واحكيلك باقي الي بقلبي
