صراحة نيوز – بقلم المهندس مدحت الخطيب
ما زلت أذكر ذلك اليوم الأليم كنا في الصف السادس شعبة(ب)..
وكانت الحصة الرابعة يوم الخميس ، و الدنيا وقت إمتحانات …
دخل علينا الأستاذ امد الله في عمره وقام بتوزيع أوراق الامتحان كالعادة ..
#بعد أقل من ربع ساعة من الامتحان سمعت صراخ من اخر الصف، كالزلزال مدحت و زميلي الاخر لن أذكر اسمه للضرورة الأخلاقية…
سلمو الورقة بتغشو والله لأحرمكم من النجاح..
#وباقل من 5 ثواني دارت الدنيا فيه ولفت، واصبت بالرعب والخوف ..
كيف أسلم الورقة…!!
ماذا صنعت…!!!!
ولماذا انا و زميلي…!!!
ماذا اقول لأهلي فما يزيد عن 70%من الاسئله ما زالت فارغة…!!!
#بين اخذ ورد ونشفان حلق…وترحم ، ودفاع مستميت من طلاب الصف، اصر معلمنا على تسليم الورقة، وانا بقيت على عنادي لن اسلمها انا ما غشيت…واكرر أثبت ذلك…
#ولكن وبعد تدخل العقلاء ومنهم العريف وصاحب النا بمقام الاخ كان اكبر منا بسنتين ، والدعم النفسي من أصدقائي المقربين.. امتثلت للأمر رغم قناعتي التامة بأنني على حق ولم اقم باي خطأ هيك هيك اجت…
#خرجت من الصف وذهبت مباشرة إلى غرفة المدير وكان يعرفني…ويعلم أنني من الطلاب المحترمين والمتميزين …
ولكن وهذا حال أغلب المدراء، قلي لويش طالع من صفك يا ولد، مين سمحلك تطلع من الحصة…فقلت وانا ابكي: الأستاذ بحكي أني غشيت وطردني من الصف!!
فتبسم على غير عادته وحكالي طيب ارجع على صفك ويوم الاحد بصير خير ، بس والله إذا طلعت غاش لأسلخ جلدك…
#عدت الى الصف وبقي فكري شارد حتى نهاية الدوام..مش خوف من الإمتحان خايف من البربيش الأسود تاعه…
#بعد انتهاء الدوام احد جيران صاحبي أراد ان يخفف دمه ” فحكاله: صحيح خليني اروح معك عشان أحكي لابوك كل القصة”…وهون بلش الأكشن والخيال الدراما…
#أبوي ؟…اه أبوك شو ما بدك تحكيله؟ والله لأحكيله اذا ما حكيت….
#عندها قررت: (من يومي صاحب قرار ) هههه…ان يذهب معي الى بيتنا وانا بحكي لابوي كل القصة وبدون كذب لانه قبلها بأسبوع اعطاني دينار لأني ما كذبت بس خربت الغساله و حكيت كيف ألعبت فيها وانحرقت…
#وبالفعل تم ذلك وكان رد أبوي مش مشكله ما دامكم صادقين انا بحلها مع الاستاذ ،وحكى لصاحبي انا بحكي لابوك ما يعاقبك عموه ما تخاف..
#يوم الاحد عادت المياه لمجاريها وخصوصا بعد ان اقتنع الأستاذ أننا صادقين…الله يسامح الي حكاله كان ملزق فوق رأسه مش مخليه يتنفس فعمل هالآكشن… وعيشنا كل هل رعب…
#رغم الخوف الرهيب بالفعل تعلمنا درس لن ننساه أبدا وخصوصا بعد تعنت الأستاذ بالأول بس بالآخر انحلت بأبسط ما يمكن ….
#اليوم ومع إصرار الحكومة على إشراك الجميع في الضمان الاجتماعي كشرط إجباري للدعم ، طيب الدكنجي، وصاحب الملبنه، والحداد، والنجار، مصلح بوابير الكاز، منين نجيبلهم واحد زي ابوي يحلها مع المدير مع أنهم صادقين …
#يا حكومتنا حتى تتحلحل أمورهم حاب اغششكم اذا المعلم بقبل…
#يا سيدي انا على يقين أن الجميع الآن أصبح مقتنع أن الضمان باب ستر لنا جميعا وملاذ آمن
وبكون مجنون الي ما بشترك فيه بعد اليوم حتى بياع الترمس ،بس فيه ناس ما بزبط يحل أموره الآن إلكترونيا، وانتم واقفين فوق راسه وبتحكو من برج عالي…اتحركو بين الشعب لا تسمعوا لواحد بده يستفيد لحاله، على حساب الآخرين حتى لو بالغش….
خلينا نخفف عليهم شوي من الامتحان ونلاقي طريقة مبسطة تا تعدي هل أزمة وبعدها الي ما بنجح من كف ايده امنعوه من الترفيه والدعم القادم،
#ما بدي اكون متشائم بس الله أعلم مصايب العالم رح تكثر… وهل كورونا شكلها رح تكون حصة #فن مش محسوبة من المعدل ، وساعتها شدو علينا بالرياضيات والفيزياء ….وبكون ساعتها ما عليكم زود فقد أعذر من أنذر…