صراحة نيوز – بقلم محمود قطيشات
من قبل المغرب
لل ١١ بالليل
وانا بَعِّد قديش مرّ على
هالبلد رؤساء حكومات
وقديم صار عنّا اصحاب
معالي
اليابان بعظمتها
والصين بضخامتها ما
عندهم وزراء قَدْنا
يا عمي احنا غير عن العالم
احنا المملكة الاردنية
الهاشمية
بعد سنتين زمان
بصير اسمنا الامبراطورية
الاردنية
وعلى ايش ؟
على القشل
بتمشي بشارع رئيسي
بتتطرجل ب ٥٠٠ وزير
وبتمشي بطريق زراعي
بتلاقي قدامك
١٠٠ رئيس حكومة
والف صاحب عطوفة
خذلك رواتب
وسيارات
وسفريات
وسفارات
ومؤتمرات
ولقاءات
وكله كذب بكذب
لو اني صاحب قرار
الداخلية والبلديات والاشغال …. وزارة وحدة
التربية والتعليم العالي
والثقافة والشباب والصحة
وزارة وحدة
التموين والطاقة والصناعة
والتجارة وزارة وحدة
التخطيط … احنا مش بحاجة تخطيط
من ٢٠ سنة واحنا بنخطط
بدل ما نمشي لقدام
بنرجع لورا
بنفسي اعرف وين راحت
المصاري اللي كانت تيجينا من برّا
ومين اللي لهطها
والله انا بعرف منو اللي
لهطها
ومنو اللي شفطها
بس انا جبان مثلي مثلكو
ما بسترجي احكي
اذا حكيت بصير انا زلمة
مشبوه
والي علاقات مع جهات
اجنبية
أمّا اللي لهطها
انا وانتو بندعي له
بهداة البال وطولة العمر
مش فاهم انا لويش كثرة
هالغثبرة
بالسنة بنغيّر ١٠٠ طاقية
طاقية البيئة للشباب
وطاقية
الشباب للثقافة
طاقية الصحة للأشغال
وطاقية الاشغال
للسياحة
احنا غير عن العالم
بنحط الرجل المناسب
بالمكان غير المناسب
موضوع الوزارات عندنا للترضية
لازم نرضي السلطية
والمسيحية
والشركس والشيشان
والقطيشات والفواخرية
والعدوان والعبابيد
وبني صخر
وبني حسن والحويطات
والطفايلة
والمعانية
الله وكيل كل وزراءنا
وزراء ترضية
واخذ خواطر
أشي بخزي
المفروض ندّور ع الكفاءة
وع المؤهل
مش ندوّر ع الجغرافيا
وخذلك
كل وزير جديد بعمل هيكلة من جديد
فضحنا عرض الهيكلة
على قد ما هيكلناها
كنت متمني على الملك
يقول لبشر الخصاونة
عموّه روّح عند مرتك احسن لك
ويجيب رئيس جديد
رئيس من رحم تراب الوطن
رئيس بعرف الاردن بالشبر
رئيس عنده رؤيا
وعنده خطة عمل
كل ما بتيجي حكومة
بتلعن اللي قبلها
وللأسف بتطلع اسفل منها
لو في مجلس نواب بحترم نفسه وبحترم الشعب
كان احنا مش هيك
يعني المجلس اللي بشتغل على ألو شو بدّه يطلع منّه …
كل ميزانية الاردن رايحة
لاصحاب الدولة
ولاصحاب المعالي والعطوفة
وللأعيان والنواب
والشعب ماكل هوا
وشارب روح الخل
واللي مش عاجبه
نشامى المخابرات
والامن الوقائي الله يحميهم
بسحبوه بنص الليل من حضن مرته
وهي تشلّخ خدودها وتصحيح
واطفاله عياطهم للسما
وحضراتهم طايحين بيه خمع بكسات
يا شباب هذا اللي رفشتوا
ببطنه قدام مرته واطفاله
هذا اردني ابن بلد
هذا اخوكو
وابن عمّكو
لو بأي لحظة يلحقّكوا ضيق بتلاقوه حامل بارودته وبدافع عنكو
دولة بشر الخصاونة
كنت اتمنى عليك تقول للملك
انا مش قد هالمسؤولية
وتغادر الدوار الرابع
الا اذا كنت خايف يرجع
سمير الرفاعي حتى يعيد مجد ابوه وجده
او يرجع هاني الملقي
او عمر الرزاز
اللي حوّلوا الاردن لمزرعة
لاهلهم ولحبايبهم
بهالبلد كلنا بنعرف الصح
وبنعرف الغلط
لكنّا بنغوبي
يعني بنتغابى
بدي اطلع لفوق شوي
هسا الاردن بكل هالكفاءات
والخبرات اللي فيه
ما لقي الملك غير العيسوي يكون
رئيس لديوانه
على فكرة
انا ما بحكي عليه كشخص
وممكن يكون احسن مني
انا بحكي عليه كمنصب
رئيس الديوان الملكي
لازم يكون برتبة بروفيسور
بتحدث اربع خمس لغات
خريج اشهر الجامعات
العالمية
مدير الإعلام لازم يكون مؤهل ويتقن معظم اللغات
ما بصير تكون مثل هاي
المناصب للترضية
او تكون بتوصية من الاجهزة الامنية
كنت اتوقع بعد الزوبعة
الاخيرة
زوبعة امتلاك الملك للشقق
والقصور خارج الاردن
ان يكون لدى الديوان
الملكي اعلام مؤهل يقنع الشعب
مش يزيد الشعب احتقان
الشعب استوى
والمنافقون في ازدياد
والشعبيات في تراجع
وهذا ليس في مصلحة
البلد
في منشور سابق لي عن موضوع تملك الملك للعقارات خارج البلد
فوجئت ببعض من كنت
اظنهم اصدقاء لي
وانهم يحبون الخير للملك
فوجئت و بكل أسف انهم طلعوا
فالصو
فليعلم الجميع اننا نحب الخير للملك
ولكن الاردن
التاريخ والحضارة
والمجد والهوى
والشوق والاشتياق
هو الارض والعرض
فوق الجميع
ومن لا يدافع عن وطن يعيش فيه
ومن لا يحب وطنه الذي
ولد ونشأ وترعرع فيه
لا يستحق ان يكون اردنيا
اقول لملك البلاد
نحن نحبك اكثر من كل المنافقين
والمتسلقين
واصحاب المصالح
وان من لا يقول لك الحقيقة
من مستشاريك
والأجهزة ذات العلاقة هم الأعداء فاحذرهم
في البلد كفاءات
نفاخر بهم الدنيا
هؤلاء يجب ان يكونوا
الاقرب لك
وهم من يقودون معك المسيرة
هدانا الله جميعا
وسدد على طريق الحق
خطانا وابعد عنك وعن الاردن
كل المنافقين الذين لا
يخافون الله وما اكثرهم
اصدقائي
لن اقرأ اي تعليق على منشوري
ييجيني على الخاص
وأي تعليق مخالف لوجهة نظري بحطّه على راسي
والله يستر
الجماعة ما يشطبوا لي
صفحتي
عملوها قبل هالمرة
ولو احلف لهم ع القرآن
اني اردني عاشق للاردن
وبحب الخير للملك
ما بصدقوني
شو اعمل مالي حظ
الحظ للاعلاميين
والصحفيين اللي بنشروا
وبنباعوا
وبقبضوا من اكثر من جهة
انا والقلة القليلة من الزملاء
ما بنتاجر بلدنا
ولا بنبيع شرفنا
لو اعطونا كل مصاري
الدنيا
اي شخص بنباع
وبنشرا
بكون قليل اصل
وعديم شرف